اخر حاجه سمعتها من ابويا عنى لما قال لستى
تعالى ياما اقولك على حاجه , مينا اترقى و بقى حاجه كبيرة اوى فى الشركة
كان بيمتحن و هيبقى حاجه كبيرة فى الشركة
كل ما اشوف تايتلى على الكارت اتبسط انى خليت ابويا فخور و فرحان بيا
كل شوية افتكر انى كنت الوحيد اللى بيقدر يبسطه و يطمنه لما بيكون خايف من التعب
و انى الوحيد اللى كنت بفوقه لو فكر يستسلم للتعب
"ابى يا بتاع النساء"
كنت بحب اقوله كده علشان كان حافظ اسامى كل المذيعات
و كان يقولى
انا ؟؟؟؟؟؟؟؟؟؟؟
اقوله اه انت
و نفضل نضحك
كنت كل ما ادخل البيت لازم ابوسه و احضنه
و يعيط لما احضنه
كان خايف
كنا مره فى كارفور
بعد فسحه كنت حاسس انى اخر مره بفسحه
قالى انا عايز زبادى
و راح معيط فى وسط الناس
!!!!!
بقينا مستغربين
بتعيط ليه يا بابا ؟ مفيش
بقينا نهزر معاه
كل ما نقوله زبادى يروح معيط
اتاريه كان نفسه فيه و عارف انه اخر مره هيدوقه
كان بيحبنى
كل ما يشوفنى يعيط
احضنه يطمن
كان تعبان اوى فى الفترة الاخير
و احلف ان ما فى يوم يا بابا تعبت من تعبك
انا لو اطول افضل اخدمك و اشيلك و اوديك المستشفى كل يوم و غلاوتك عندى ما همانع
سامحنى انك تعبت
بس صدقنى ما كان فى ايدى اى حاجه اقدر اعملها
انا عملت كل حاجه
و غلاوتك ما استخسرت او كسلت فى يوم
و انت اكيد دلوقتى عارف اللى كان بيحصل من وراك
الحاجه الوحيده اللى كنت بتضايق منها فى تعبك هو انك تعرف انك تعبان
انت مبتستحملش تعرف انك تعبان
كنت بخبى عنك حاجات كتير علشان متخافش
و كنت بحاول دايما اطمنك
اللى كان بس بيفكر انك ممكن يحصلك حاجه انا كنت بهزقه
و حياتك و لا حد كان يقدر يقول عليك كلمة
كنت بتبسط لما لبست ساعتى
كنت بحس اخيرا انى قدرت اعملك اى حاجه حلوة
كنت بتبسط لما اوديك الشغل
كنت بتبسط لما انزلك من العربية قدام زمايلك
و ببقى فخور لما ببقى قاعد جنبك على مكتبك
وحشتنى صدقنى نفسى اهزر معاك
هتفضل دايما الراجل المحترم الوحيد فى حياتى
هتفضل دايما الرجل اللى مستحيل ابقى زيه مهما حاولت
فخور انى ابنك
د مينا عزمى
زى ما انت مسمينى على الموبيل
No comments:
Post a Comment