تدخل البابا شنوده - فى اى موقف يكون الاقباط طرف فيه - ينتظره الكل , فيهم اللى مستنى رايه علشان يطيعه و فى اللى مستنى كلمة منه علشان يمكسها عليه و يتهمه بالخيانة او العماله
و لكن لو وزنا الامور بحيادية هنلاقى ان مواقف الكنيسة و البابا .............ـ
و لنأخذ مواقف البابا منذ احداث 25 يناير و الى الأن
- من اول ايام الثورة و كان موقف الكنيسة و البابا هو عدم المشاركة , بحجه اننا منعرفش من وراء المظاهرات
http://is.gd/NPCtcc
http://is.gd/WBizwh
طيب ولو كنا عارفين ؟
المظاهرات خرجت نتيجه الضغط الذى اطلق كل الكره و البغض ضد النظام و رموزه ممثلا فى الداخليه , خط التعامل الاول ما بين النظام و الشعب
و كلنا عارفين ان الثورة فى اولها مكانش مترتب ليها كل اللى حصل , ده حتى كل الناس على صفحة كلنا خالد سعيد بتدعى ان الرقم يوصل لـ 100 الف متظاهر
انا حاسس ان الكنيسة بتتكلم بكسوف , خايف يقول تظاهروا رغم اننا شايفين الويل ,كل مواقف الكنيسة من الثورة بتكسفنى , انا مش بقول انهم يقولوا تظاهروا يا جماعه
لكن على الاقل ميطلبش من الناس انها متخرجش
يقول احنا بنطلب الخير لمصر , و نرفض التخريب و التدمير , اى كلام عايم يتاخد على الناحيتين على الأقل
و خصوصا اننا ايام الثورة كنا واخدين قلم جامد و اتفجرلنا كنيسة و ماتلنا اكتر من 25 واحد يومها
ليه بقى نطاطى ليهم ؟ مش لاقى سبب غير خوفنا للثورة تفشل و يبقى شكلنا وحش قدام الحكومة
و رجعت الكنيسة تتكلم على ان الثورة من حق الشعب و ان الشعب من حقة يطالب بحقوقه و باركت الثورة
http://is.gd/tSVSYs
انا مش بقول ان ده تناقض
بس الاكرم لينا اننا مكناش نرفض الاشتراك و بعد كده نقول ده طلعت حلوة
شباب كتير شارك و منهم اللى مات
http://is.gd/bqWq63
و كنا دايما بنرد على اللى بيهاجم موقف الكنيسة و نقوله ان ده رأى البابا الشخصى و هو غير ملزم ليا انى منزلش و الدليل انى نزلت
و لكن برده بكون من جوايا مش مبسوط
ده كان موقف الكنيسة من الثورة
ناس ممكن تشوف ان البابا كان عنده حق و ان الثورة مجابتش غير الخراب و الاخوان و السلفيين لحد دلوقتى
و عن نفسى فى مرة لعنت اليوم اللى فكرت فيه انى اشارك فى ثورة يكون من توابعها موت ناس ذنبهم الوحيد - ان كان ذنب اساسا - انهم مسيحين
و ناس ممكن تشوف ان الثورة بينت قد ايه كنا بنتسرق وكان بيتلعب بالبلد بنك الحظ بكل كروتها - حتى كارت الخروج مجانا من السجن - و ان حتى الامن اللى كنا عايشين فيه كان مرهون بانك تفضل متهان و ملكش حق تفتح بقك
ده موقف الثورة
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
نيجى بقى لموقف تاصونى كاميليا
تاصونى لحد دلوقتى محدش يعرف هى خرجت ليه من بيتها
كل اللى نعرفه انها ايامها مكانتش مخطوفه
من الاخر خروجها من البيت مهما كان اسبابه كان بمزاجها
يقوم حبة شباب مسيحى عاملين مظاهره ان مرات ابونا اتخطفت
يقوم محدش من الكنيسة يتكلم
يقوم امن الدولة جايبها من شعرها و مرجعها لاهلها
يطلع الانبا اغابيوس يقول اننا هناخدها نغسل لها مخها من الافكار
http://is.gd/1AK5EO
(بعتذر عن اسم الفيديو)
اكيد الانبا اغابيوس ميقصدش اللى بيقوله
بس لو هو مش كفء اعلاميا - و ده مش عيب - و ده باين من طريقة كلامه فى الفيديو , يبقى نشوف حد يعرف يتكلم
الاخوة الاذكياء افتكروا اننا عندنا فى الكنيسة غسالات اوتوماتيك
و اننا مشغلينها ليل نهار للاخوات
راحوا طالعين بمظاهره اننا محتجزينها
راحت طالعه فى فيديو و قالت انا كويسة و مسيحية
http://is.gd/fTKHmy
و الامن و القناة الاولى قالوا ان الفيديو سليم
الاخوه السلف قالوا انه مزور و هنوريكوا هنعمل ايه
كل ده و موقف الكنيسة مش واضح
رغم انه موقف قوى جدا
و مرت الاحداث و المظاهرات و وصل الامر للكاتدرائية
مشفتش اى بيان من الكنيسة بيطلب من الجيش انه يفرض الحماية على الكنايس او يشوف حل مع التخلف
او حتى يقول ايه اللى حصل ده ؟ ازاى يحصل ؟
وصل الامر للنيابه
و الكنيسة رفضت استلام امر الاحضار
و ده موقف ممتاز
تقوم كاميليا تطلع على قناة الحياة!!!!!!!!ـ
و ده لو كان بعلم الكنيسة يبقى غلط
مكانش ينفع تطلع على سى تى فى او اغابى لانها قنوات رسمية و ظهور كاميليا عليهم معناه ان الكنيسة ليها دخل فى الموضوع
و ده موقف حلو من الكنيسة
من الاخر اللى يتاخد على الكنيسة -
رغم ان كان ممكن يبقى قلم عفى على قفا الاخوة بتوع المسلمين الجدد - فى موضوع كاميليا هو انها تعاملت معاه على انها ملهاش دخل تماما و ده مش صح, لان الموضوع وصل للكاتدرائية و فى اسقف اتكلم , بس كان ممكن الموضوع يتحل اسرع من كده
موقف الكنيسة من احداث امبابة
علشان ملكش كتير
الموقف اللى اخدناه
هو التالى
http://is.gd/g6LLyB
الشباب اخد نفسه و على ماسبيرو
اتضرب و الجيش اعتقل العاطل بالباطل
و البابا يطلب فض الاعتصام!!!!!أ
و الناس رفضت
http://is.gd/6IvNQd
ليه البابا عايز يفض الاعتصام ؟
علشان السياسة بتقول ان المجلس العسكرى لازم يتاخد بالحنين , و نعامله زى ما كان بيتعامل مبارك على انه اله
و علشان مش هنعرف ناخد حقنا بالاعتصام
و اظن ان نتيجه اعتصام كام يوم فى ماسبيرو كان من نتايجه
فتح كنايس مقفولة
قانون دور عبادة موحد
و ده مكاسب مكانش يحلم بيها اى مسيحى تحصل و لو حتى بعد الثورة
محدش يقولى ان الكنايس مش هتتفتح
كفاية ان القرار طلع , و هيتنفذ يعنى هيتنفذ
مهما كانت العواقب
عرفى بقى مش عرفى
هتتفتح
الاكرم لينا ان البابا مكانش اتكلم و لا اتدخل فى الموضوع زى ما كان دايما رد الفعل اننا بنسكت , و لا علشان طلع لينا صوت ,و لا هو مكتوب علينا الذل ؟
قد تكون نظرتى قصيرة و مفيهاش ايمان بربنا و بحكمة البابا و قدرته على وزن الامور بخبرة سنين حياته
بس هى ده نظرتى
